मेलम्ची- सिन्धुपाल्चोक बागमती प्रदेशका खानेपानी, ऊर्जा तथा सिँचाइ मन्त्री कृष्णकुमार तामाङ (समिर) ले विद्यालयको विकासका लागि आफू सधैं क्रियाशील रहने बताउनुभएको छ। मेलम्ची नगरपालिका वडा नम्बर ४ स्थित कृष्ण माध्यमिक विद्यालयको ६५औं जन्म जयन्ती तथा २७औं अभिभावक दिवस कार्यक्रमलाई सम्बोधन गर्दै उहाँले आफू बोल्ने भन्दा पनि काम गरेर देखाउने व्यक्ति भएको दाबी गर्नुभयो।
शिक्षामा लगानी र खबरदारी कार्यक्रमका विशिष्ट अतिथि एवं बागमती प्रदेशसभा सदस्य कुमारी तामाङले विद्यालय शिक्षामा पर्याप्त लगानी नभएको भन्दै सरकारको आलोचना गर्नुभयो। “हेलिकप्टरमा हिड्नेलाई जनताको पीडा थाहा हुँदैन,” भन्दै उहाँले शिक्षा र स्वास्थ्यका समस्या समाधानका लागि आफूले निरन्तर खबरदारी गरिरहेको बताउनुभयो। साथै, देशको विकासका लागि आफ्नो धर्म र संस्कृतिको संरक्षण अनिवार्य रहेको उहाँको तर्क थियो।
नगरपालिकाको भूमिका र प्रतिबद्धता मेलम्ची नगरपालिकाका उपप्रमुख उमा प्रधानले विद्यालयलाई ‘विद्याको मन्दिर’का रूपमा पुज्नुपर्ने बताउँदै नगरपालिकाले शिक्षा क्षेत्रमा उल्लेख्य प्रगति गरेको जानकारी दिनुभयो। उहाँले भन्नुभयो, “हामीले आवश्यकता अनुसार शिक्षक दरबन्दी र राहत शिक्षकको व्यवस्था गरेका छौं। आगामी बजेटमा पनि विद्यालयको भौतिक र सामाजिक विकासलाई प्राथमिकता दिनेछौं।” उहाँले यस क्षेत्रमा छिट्टै स्वास्थ्य चौकी र क्याम्पस सञ्चालनका लागि बजेट व्यवस्थापन गर्ने प्रतिबद्धता समेत व्यक्त गर्नुभयो।
क्याम्पसको नाम र स्थानमा विवाद वडा नम्बर ४ का अध्यक्ष सञ्जीव तामाङले सिन्धुभ्याली क्याम्पसको नाम र स्थानप्रति असन्तुष्टि जनाउनुभयो। काठमाडौँको सीमामा रहेको क्याम्पसले सिन्धुबेल्टको प्रतिनिधित्व नगर्ने भन्दै उहाँले त्यसको नाम ‘भोटेचौर क्याम्पस’ राख्न चुनौती दिनुभयो। विद्यार्थी पलायन रोक्नका लागि सबैलाई पायक पर्ने गरी ‘सेन्टर’मा क्याम्पस स्थापना हुनुपर्ने उहाँको माग थियो।
सांस्कृतिक रौनक विद्यालय व्यवस्थापन समितिका अध्यक्ष बद्री चौलागाईंको अध्यक्षतामा भएको उक्त कार्यक्रममा इन्द्रेणीका कृष्ण कँडेल र उनको टोलीले विशेष सांगीतिक प्रस्तुति दिएका थिए। सो अवसरमा विद्यार्थीहरूले आफ्नो आन्तरिक प्रतिभा र कला समेत प्रदर्शन गरेका थिए।
